കവിതാഡയറി

6
ധ്യാനം
നിങ്ങളുടെ ദേഹശക്തി,ജീവശക്തി,ആത്മശക്തി
എല്ലാം മുഴുവനായും മൂക്കിന്‍ തുമ്പത്ത് ചേര്‍ത്തുവെക്കുക
മറ്റൊന്നും കാണരുത്,കേള്‍ക്കരുത്,ഓര്‍ക്കരുത്
ഒരു ചിന്തയുമരുത്,വികാരവുമരുത്
നിങ്ങളുടെ കാഴ്ച,കേള്‍വി,സ്പ്ര്‍ശം,ഗന്ധം
എല്ലാം നിങ്ങളുടെ മൂക്കിന്‍ തുമ്പ് മാത്രം
ഇരുന്നല്ലോ,മൂന്ന് മിനുട്ട് നേരം അങ്ങനെ ഇരുന്നല്ലോ
ഇനി പറയൂ,എന്തു തോന്നുന്നു?
ഗുരോ,ഞാന്‍ എന്തൊരു വിഡ്ഡിയാണെന്ന് തോന്നുന്നു
ആനന്ദിക്കൂ,ആനന്ദിക്കൂ
ആത്മജ്ഞാനത്തിലേക്കുള്ള ആദ്യചുവടാണാ തോന്നല്‍
ഇനി ആവര്‍ത്തിക്കൂ,ആദ്യം ചെയ്തത്
ആറ് മിനുട്ട് നേരത്തേക്ക് ആവര്‍ത്തിക്കൂ
ഒരേയൊരു ചിന്ത,വികാരം,അനുഭൂതി
നിങ്ങളുടെ മൂക്കിന്‍ തുമ്പ് മാത്രം
ഇപ്പോള്‍ നിങ്ങളില്ല,ഞാനില്ല
ഈ ഭൂമിയില്ല,പ്രപഞ്ചമില്ല
അവനില്ല,അവളില്ല,ആരുമില്ല
അതില്ല,ഇതില്ല,ഒന്നുമില്ല
നിങ്ങളുടെ മൂക്കിന്‍തുമ്പ് മാത്രം
ഇരുന്നല്ലോ,ആറ് മിനുട്ട് നേരം ഇരുന്നല്ലോ
ഇനി പറയൂ,എന്തു തോന്നുന്നു?
ഗുരോ,ഇപ്പോഴും ഞാന്‍ എന്തൊരു വിഡ്ഡിയാണെന്ന് തോന്നുന്നു
ഈ തോന്നല്‍ ആത്മജ്ഞാനത്തിലേക്കുള്ള ആദ്യപടിയാണെന്നു തോന്നുന്നു
അങ്ങ് ഈ ആദ്യപടിയില്‍ പോലും എത്തിയില്ലല്ലോ എന്നു തോന്നുന്നു.
25-3-2012