ഒരു രൂപകത്തിന്റെ പൊരുൾ

ഓർമയിൽ മിന്നിമാഞ്ഞ ഒരു രൂപകത്തിൽ
എന്നെ ഞാൻ
സമ്പൂർണമായും വ്യാഖ്യാനിച്ചിരുന്നല്ലോ
അത് എന്നേക്കുമായി കൈവിട്ടുപോയല്ലോ
എന്ന സങ്കടം
ഉള്ളിലൊരു പിറുപിറുപ്പായി ഉയർന്ന്
ഓർത്തോർത്തിരിക്കെ അകം നിറയുന്ന
പെരുമ്പറമുഴക്കമായി മാറുന്നതിനിടയിൽ
ഓർമ വന്നു : മിന്നിമാഞ്ഞു എന്നതു തന്നെയായിരുന്നു
ആ രൂപകത്തിന്റെ പൊരുൾ
ഓർമയുടെയെന്നല്ല ആത്മബോധത്തിന്റെയും
കരുതലുള്ള കാവൽക്കാരനല്ല ഞാൻ.