വിശേഷം

വിശേഷിച്ചൊന്നുമില്ല
അതു മാത്രമാണ് വിശേഷം
ഒരുപാട് വർത്തമാനം പറഞ്ഞിരുന്നവർക്കിടയിൽ
ഒരണലിപ്പാമ്പുപോലെ മൗനം വന്നുകിടക്കുന്നത്
ആശയങ്ങൾ, ആഹ്ലാദങ്ങൾ, ആശങ്കകൾ
അങ്ങനെ പൊതുവായി ഉണ്ടായിരുന്ന പലതിനും
മരണദംശനമേൽക്കാൻ പോവുന്നതിന്റെ
മുന്നറിയിപ്പ്  തന്നെ
വിശേഷിച്ചൊന്നും പറയാനില്ല
എന്ന വിശേഷമെങ്കിലും പങ്കുവെച്ച്
ഈ അണലിയെ അകലേക്ക് പായിക്കാൻ
ഒരവസാനശ്രമം
അതിൽക്കവിഞ്ഞ പ്രതീക്ഷകൾ
അതിമോഹത്തിനും അപ്പുറത്താണ്,സുഹൃത്തേ.