തമ്മിൽ ഭേദം

നിത്യമായ ആതിത്ഥ്യം സ്വീകരിച്ച്
ദൈവത്തിന്റെ വീട്ടിലേക്ക് പോവാൻ
തുടങ്ങുകയാണ് താനെന്ന്
പറയാനാഞ്ഞതായിരുന്നു അയാൾ
പെട്ടെന്ന് ബസ്സ് വന്നു
വല്ലപാടും അകത്ത് സ്വയം തിരുകിക്കയറ്റിവെച്ച്
പുറത്തേക്ക് കണ്ണയച്ചപ്പോൾ തോന്നി
കൊള്ളാം,തിക്കും തിരക്കും
വെടിയും പൊടിയുമൊക്കെ ഉണ്ടെങ്കിലും
ഇനിയും കുറച്ചുകാലത്തേക്ക് ഇവിടെയിങ്ങനെ കഴിയാം
ദൈവത്തിന്റെ വീട്ടിൽ പാലും പഴവും കഴിച്ച്
സദാസമയവും ഭക്തിഗാനങ്ങളും കേട്ട്
ഇരിക്കേണ്ടി വന്നാലത്തെ സ്ഥിതിയെന്താണ്?

ഒരു ദു:സ്വപ്നം

സ്വപ്നം നിറയെ കന്നുകാലികളായിരുന്നു.അവ എല്ലാ പച്ചപ്പുകളും തിന്നുതീർത്തതിനാൽ നേരം വെളുത്തപ്പോഴേക്കും  അയാളൊരു വരണ്ട മൊട്ടക്കുന്നായി.ആ മൊട്ടക്കുന്നിന്റെ താഴ്‌വരകളിൽ നിന്ന് ചെന്നായ്ക്കൾ കൂട്ടംകൂട്ടമായി മുകളിലേക്ക് കയറാൻ പിന്നെ താമസമുണ്ടായില്ല.

തീരം

എന്നോ വന്നു മടങ്ങിപ്പോയ
ഏതോ ഒരു തിരയെ കാത്തുനിൽക്കുന്ന
 തീരമാണ് ഞാൻ
കാലമൊരുപാട് കടന്നുപോയി
ഇപ്പോൾ ഞാനൊരു തീരവുമല്ല
നനവിന്റെ വിദൂരസ്മരണകൾ പോലും
വിട്ടകന്ന വ്യർത്ഥമായ മണൽ പരപ്പ്.

ഒരു വെമ്പൽ

ഒരു ചെറിയ ചെടിയുടെ
ചെറിയ ഇല പോലെ
വിനീതനും വിശുദ്ധനുമാവാൻ
ഞാൻ ആഗ്രഹിക്കുന്നില്ല
ആയിരക്കണക്കിന് വർഷങ്ങളുടെ
ആയുസ്സുള്ള വന്മരമാവാൻ
തന്നെയാണ് മോഹം.
എങ്കിലും ചിലപ്പോൾ
ഒരു ചെറിയ ചെടിയുടെ
ചെറിയ ഇല
എന്നെ തരളിതനാക്കുന്നു
അതിന്റെ കുഞ്ഞു ഞരമ്പുകളിലേക്ക്
സംക്രമിക്കാൻ എന്റെ ജീവൻ വെമ്പൽ കൊള്ളുന്നു.

അതാ ഇരിക്കുന്നു!

അലങ്കാരങ്ങൾക്കു വേണ്ടി അലഞ്ഞിരിക്കില്ല
പഴയ കാലകവികൾ
വാരിധി തന്നിൽ തിരമാലകളെന്ന പോലെയോ
വാനിൽ മേഘങ്ങളെന്ന പോലെയോ
കാട്ടരുവിക്കരയിൽ മൃഗങ്ങളെന്ന പോലെയോ
നാട്ടുമരക്കൊമ്പിൽ പറവകളെന്ന പോലെയോ
അവ വന്നുകൊണ്ടേയിരുന്നിരിക്കാം
കാലം മാറി
അലങ്കാരങ്ങൾ ആ വിധത്തിൽ വന്നു തുടങ്ങിയാൽ
അതോടെ കവിതയുടെ  കഥ കഴിയും
ഉപമയ്ക്കും ഉൽപ്രേക്ഷക്കും
ഒരുവിധത്തിലുള്ള ഉരുട്ടുകളികൾക്കും വഴങ്ങാത്ത
ഉള്ള് പൊള്ളിക്കുന്ന സത്യം കനൽപോലെ കണ്മുന്നിലുണ്ട്
അതിന് കവിതയിൽ ഇടം നൽകാനുളള ആത്മധൈര്യം
അത് കൈമോശം വന്നതിന്റെ ജാള്യതയുമായി
അതാ ഇരിക്കുന്നു അണ്ടി പോയ അണ്ണാനെപ്പോലെ
ഒരു പുതിയകാല കവി.

മാപ്പ്

പറഞ്ഞു പറഞ്ഞ്
ഇനിയിപ്പോ…ഒന്നും പറയാനില്ല
പിന്നെ,നിങ്ങക്ക് നിർബന്ധമാണെങ്കീ
ഒരു മാപ്പ് പറയാം
കവിതയും കഥയും ലോകവിചാരവുമെല്ലാം
അതിലൊതുങ്ങുന്നൂന്നങ്ങ് മനസ്സിലാക്കിയാ മതി.
24/4/2017

വിശേഷം

വിശേഷിച്ചൊന്നുമില്ല
അതു മാത്രമാണ് വിശേഷം
ഒരുപാട് വർത്തമാനം പറഞ്ഞിരുന്നവർക്കിടയിൽ
ഒരണലിപ്പാമ്പുപോലെ മൗനം വന്നുകിടക്കുന്നത്
ആശയങ്ങൾ, ആഹ്ലാദങ്ങൾ, ആശങ്കകൾ
അങ്ങനെ പൊതുവായി ഉണ്ടായിരുന്ന പലതിനും
മരണദംശനമേൽക്കാൻ പോവുന്നതിന്റെ
മുന്നറിയിപ്പ്  തന്നെ
വിശേഷിച്ചൊന്നും പറയാനില്ല
എന്ന വിശേഷമെങ്കിലും പങ്കുവെച്ച്
ഈ അണലിയെ അകലേക്ക് പായിക്കാൻ
ഒരവസാനശ്രമം
അതിൽക്കവിഞ്ഞ പ്രതീക്ഷകൾ
അതിമോഹത്തിനും അപ്പുറത്താണ്,സുഹൃത്തേ.

ദാസന്മാർ

തെറ്റും ശരിയും തിരിച്ചറിയാൻ
നിങ്ങൾക്കോ എനിക്കോ
വിഷമമേതുമില്ല
എങ്കിലും തെറ്റേത്,ശരിയേത്
എന്നു ഞാനറിയുന്നില്ല
കണ്ടുകണ്ടിരിക്കെ തെറ്റ് ശരിയാകാം
ശരി തെറ്റുമാകാം
എന്നു പറയാനാണ് നമുക്ക് താൽപര്യം
നാം കാപട്യം ശീലിച്ചുപോയതുകൊണ്ടല്ല
നമ്മുടെ കാലം നമ്മിൽ നിന്നാവശ്യപ്പെടുന്നത്
അത് മാത്രമാണ്
പ്രാചീനരെന്ന പോലെ ആധുനികരും
ആധുനികരെന്ന പോലെ ആധുനികോത്തരരും
കാലത്തിന്റെ ദാസന്മാർ തന്നെ.

അഹോ!

ഞാൻ ആട് എന്നു പറയുമ്പോൾ
നിങ്ങൾ പൂട എന്ന് കേൾക്കുന്നു
മൂല്ലപ്പൂ എന്നു പറയുമ്പോൾ
താമര എന്ന് കേൾക്കുന്നു
കൊലപാതകം എന്നു പറയുമ്പോൾ
കോപ്പിയടി എന്ന് കേൾക്കുന്നു
പാലി എന്നു പറയുമ്പോൾ സംസ്‌കൃതം
കൊള്ളക്കാരൻ എന്നു പറയുമ്പോൾ ബ്രഹ്മജ്ഞൻ
അധ്യാപകൻ എന്നു പറയുമ്പോൾ ഒത്താശക്കാരൻ
ഇന്നലെയും മിനിഞ്ഞാന്നും
അതിനപ്പുറത്തെ ദിവസവും
അതായിരുന്നു അനുഭവം
ഇന്നിപ്പോൾ ഞാൻ വാല്വേഷൻ കാമ്പിലാണ്‌
പത്താം ക്ലാസുകാരുടെ പരീക്ഷാപേപ്പറുകൾ
പടപടാ പരിശോധിക്കുകയാണ്
ഇതാ വരുന്നു ഒരു മിടുക്കന്റെ/മിടുക്കിയുടെ പേപ്പർ
ജനാധിപത്യത്തിന് അവൻ/അവൾ
എത്ര കൃത്യമായി സ്വേച്ഛാധിപത്യം എന്ന്
സമാനാർത്ഥപദം എഴുതിയിരിക്കുന്നു
അഹോ! എന്തൊരു ദീർഘദർശനവൈഭവം
ഞാൻ കോരിത്തരിക്കുന്നു
പോരെന്നുണ്ടെങ്കിൽ പുളകിതഗാത്രനാവുന്നു
ആര് പറഞ്ഞു
നമ്മുടെ കുട്ടികൾക്ക് ഒന്നുമറിയില്ലെന്ന്.

കേൾവിക്കാരൻ

ഏത് ചർച്ചയിലും ഒരാൾ പറയുന്ന സത്യം
വേറൊരാൾക്ക് അസത്യമാവുന്നു
ആരോ ഒരാൾ കള്ളം പറയുകയാണെന്ന് വ്യക്തം
അത് ആരെന്ന് തിരിച്ചറിയുമ്പോഴും
സത്യവാന്റെ കൂടെ നിൽക്കാൻ ഞാൻ താൽപര്യപ്പെടുന്നില്ല
ഇന്നത്തെ സത്യവാൻ ഇന്നലെ കള്ളനായിരുന്നുവെന്നും
നാളെയും അയാൾ അങ്ങനെയാകാമെന്നും  അറിയുന്നതിനാൽ
വെറുമൊരു കേൾവിക്കാരനായി തുടരുകയേ
എനിക്ക്‌ നിവൃത്തിയുള്ളൂ.

നിങ്ങൾ തന്നെ കണ്ടെത്തുക

ശാന്തരായിരിക്കുക
ആത്മസംയമനം ശീലിക്കുക
ആര് എന്ത് തെറ്റ് ചെയ്താലും
അതിനൊരു ന്യായീകരണം
സാധ്യമാവുമെന്ന് അകമേ
അറിഞ്ഞുകൊള്ളുക
ഹിംസ ,കൊലപാതകം,നീതിനിഷേധം
എല്ലാം നാട്ടുനടപ്പാവുന്നതിൽ
അന്ധാളിക്കാതിരിക്കുക
ഈയൊരു മനോഭാവം ഇപ്പോൾ
ഇടയ്ക്കിടയ്‌ക്കേ ആവശ്യം വരൂ
നാളെ ഇത് രാവും പകലും
ഒഴിച്ചു കൂടാനാവാത്ത ഒന്നാവും
അത് മുൻകൂട്ടി കണ്ടറിഞ്ഞ്
എന്നെയും നിങ്ങളെയും അതിനു വേണ്ടി
പാകപ്പെടുത്തിയെടുക്കുന്നവർ ആരാണ്?
ഓപ്ഷൻ എ…
ഓപ്ഷൻ ബി…
ഓപ്ഷൻ സി…
ഈ ഒരു ചോദ്യത്തിനുള്ള
ഒരേയൊരു ചോദ്യത്തിനുള്ള
ഒരേയൊരു ശരിയുത്തരം
നിങ്ങൾക്ക് നേടിത്തരിക ജീവിതമോ,മരണമോ?
അതിനുള്ള ഉത്തരവും നിങ്ങൾ തന്നെ കണ്ടെത്തുക

ഒരു രൂപകത്തിന്റെ പൊരുൾ

ഓർമയിൽ മിന്നിമാഞ്ഞ ഒരു രൂപകത്തിൽ
എന്നെ ഞാൻ
സമ്പൂർണമായും വ്യാഖ്യാനിച്ചിരുന്നല്ലോ
അത് എന്നേക്കുമായി കൈവിട്ടുപോയല്ലോ
എന്ന സങ്കടം
ഉള്ളിലൊരു പിറുപിറുപ്പായി ഉയർന്ന്
ഓർത്തോർത്തിരിക്കെ അകം നിറയുന്ന
പെരുമ്പറമുഴക്കമായി മാറുന്നതിനിടയിൽ
ഓർമ വന്നു : മിന്നിമാഞ്ഞു എന്നതു തന്നെയായിരുന്നു
ആ രൂപകത്തിന്റെ പൊരുൾ
ഓർമയുടെയെന്നല്ല ആത്മബോധത്തിന്റെയും
കരുതലുള്ള കാവൽക്കാരനല്ല ഞാൻ.

ഓരോ ജീവിക്കും ഓരോന്നല്ലേ ?

ഈ നിമിഷം കണ്ടിടത്ത്
അടുത്ത നിമിഷം കാണില്ല
ഇപ്പോൾ കാൽസറായിയും കോട്ടുമിട്ടു കണ്ടാൽ
അടുത്ത നിമിഷം ഉടുതുണിയില്ലാതെ കാണും
പകൽനേരത്ത് പറവയായി കണ്ടെങ്കിൽ
രാത്രിയിൽ പാമ്പായി കാണും
ആമയായി പറക്കും
പരുന്തായി നടക്കും
ഒച്ചായി ഓടും
മാനായി ഇഴയും
കണ്ടുകണ്ട് കാണുന്നവന്റെ കാഴ്ച പോകും
കേൾവി പോകും
വെളിവ് പോകും
എല്ലാം മുൻകൂട്ടി അറിയാവുന്നതുകൊണ്ട്
ഒന്നും  ഞാൻ കാണുന്നില്ല
കേൾക്കുന്നില്ല
കിട്ടുന്നതിലൊരു പങ്ക് ചെകുത്താൻ
എനിക്കും കൊണ്ടുത്തരുമായിരിക്കും
അതുവരേക്കും ആകാശം നോക്കി
അന്തംവിട്ടതുപോലെ കിടക്കാം
ഓരോ ജീവിക്കും ഓരോന്നല്ലേ ആത്മരക്ഷോപായം?

വേനലിനപ്പുറത്തേക്ക്

കൊടും വേനലാണ്
അകത്തും പുറത്തും
എല്ലാ നാമ്പുകളും കരിഞ്ഞു
അകത്തും പുറത്തും.
എങ്കിലും വിത്തുകളും ചില വേരുകളും
മണ്ണിലും മനസ്സിലും കരിയാതെ നിൽക്കുന്നു
അവ അവയുടെ ജന്മദൗത്യം
നിറവേറ്റുകയാവാം എന്നതിലപ്പുറം
മറ്റൊന്നും ഞാൻ ആലോചിക്കുന്നില്ല.
1/4/2017

ആകാശവും ഭൂമിയും പിന്നെ ഞാനും

ഒരിക്കൽക്കൂടി വിത്തായി,ചെടിയായി,
മരമായി മാറാൻ കൊതിയില്ലായ്കയല്ല

പക്ഷേ, ഒരു വിത്തിന് ഒരിക്കലേ മുളക്കാനാവൂ
എന്ന തീർപ്പ് തിരുത്തപ്പെടില്ല
പിന്നെ ചെയ്യാവുന്നത് ശാഖകൾ വളച്ചും
അടിയോടെ വളഞ്ഞും 
മണ്ണിൽ തൊടുക മാത്രമാണ്
എനിക്കതിൽ താൽപര്യമില്ല
ഞാൻ ആകാശത്തേക്കു തന്നെ നോക്കുന്നു
പകൽ നേരത്ത് സൂര്യൻ,രാത്രിയിൽ ചന്ദ്രൻ,നക്ഷത്രങ്ങൾ
ഞാൻ പുതിയ വിത്തുകൾ ഭൂമിക്ക് നൽകിക്കൊണ്ടേയിരിക്കുന്നു.

ഇവിടെയുണ്ട് ഞാൻ

ഇവിടെയുണ്ട് ഞാൻ
എല്ലാവരും മറന്ന വഴിപോലെ
വേട്ടക്കാരനും വേണ്ടാത്ത മൃഗം പോലെ
ഖനനത്തിലും കണ്ടെടുക്കാത്ത
പുരാവസ്തുപോലെ
ഇവിടെ  ഉണ്ട് ഞാൻ
ഒരു ഭാഷയിലും പ്രവേശിക്കില്ലെന്നുറച്ച വാക്ക് പോലെ
ഒരുടലിലും പുനർജന്മമാഗ്രഹിക്കാത്ത
ആത്മാവ് പോലെ.

.

അതിലും വലുതായി എന്താണെനിക്ക് മോഹിക്കാനാവുക?

ഞാൻ കടലിലേക്ക് നോക്കി
കടൽ എന്നെ കണ്ടതായി നടിച്ചില്ല
എന്നുവെച്ച് ഞാൻ നോക്കിയ നോട്ടം
പാഴായിപ്പോയെന്ന് പറയാനാവില്ല
എന്നിൽ നിന്ന് പോയ നോട്ടം
എന്നിലേക്ക് മടങ്ങി വരില്ല.

കടലിന് വേണ്ടാത്ത വസ്തുക്കൾക്കൊപ്പം

ഇന്നല്ലെങ്കിൽ നാളെ അത് കരയിലേക്ക് തിരിച്ചു വരും
കണ്ണിന്റെ രൂപമുള്ള ഒരു ചിപ്പി കണ്ട്
ഏതോ ഒരു കുട്ടി ഓടിച്ചെന്നെടുക്കും
അതിലും വലുതായി എന്താണെനിക്ക് മോഹിക്കാനാവുക?
15/2/2017

എത്ര ഉദാരമതികൾ!

എല്ലാം കാണുന്നു ,കേൾക്കുന്നു,അറിയുന്നു
അന്ധനും ബധിരനും അജ്ഞനുമായിരിക്കാൻ
എന്നോടാവശ്യപ്പെടുന്നവരെ ഞാൻ അനുസരിക്കുന്നു
അനുസരണയ്ക്ക് പകരമായി അവർ ഉറപ്പ് തരുന്നത്
എന്റെ ജീവനാണ്,എത്ര ഉദാരമതികൾ!
13/2/2014

ദു:ഖം

ഓരോ ചുവടും പതുക്കെപ്പതുക്കെ വെച്ച് നടന്നു പോകുന്ന ഒരു വൃദ്ധനെ കണ്ടു.അങ്ങേയറ്റം അവശനായിരുന്നു അയാൾ.ഹ്രസ്വമായ ഒരു സംഭാഷണത്തിനിടയിൽ ആ മനുഷ്യൻ  പറഞ്ഞു: 'കൗമാരപ്രായം മുതൽ ഇന്നേ വരെ എന്നെ അനുഗമിച്ച ദു:ഖം ഒന്നുമാത്രമാണ്.സ്‌നേഹം ഒളിച്ചുവെക്കേണ്ടി വരുന്നതിന്റെ ദു:ഖം.'
5/12/2016

രണ്ട് നിര്‍ദേശങ്ങള്‍

1
ശത്രുവിന്റെ കയ്യില്‍
ശത്രുത മാത്രമേ ഉള്ളുവെങ്കില്‍
അയാള്‍ക്കു വേണ്ടി നേരം കളയരുത്.
2
ഒരാളുടെ സ്വാഭിപ്രായത്തില്‍
ഭീതിയോ പ്രീതിയ്ക്കുള്ള ദാഹമോ
പതയുന്നതുന്നു കണ്ടാല്‍
അയാള്‍ക്കുവേണ്ടിയും
നേരം കളയരുത്