മൂരാച്ചി,ശില,മൌനി

1
തെരുവിലെ ചോരയില്‍ നിന്നുയിര്‍ക്കൊള്ളുന്ന
'പുതിയ വീര്യ'ത്തിന്‍ പഴങ്കഥ പാടുവാന്‍
മടിയുണ്ടതിനാല്‍ സഖാക്കളേ ഞാനൊരു
മടിയനായ്,ഭീരുവായൊരുവേള
കൊടിയ മൂരാച്ചി തന്നെയായ്
കാലം കഴിക്കുന്നു.
2
പലതുണ്ട് പ്രാര്‍ത്ഥിക്കാനെങ്കിലും ദൈവമേ
ബധിര കര്‍ണത്തിലാണവചെന്നു വീഴ്കയെ-
ന്നറിവതിനാലിന്നു മോഹങ്ങള്‍,നോവുകള്‍,ഭീതികളൊക്കെയും
കുഴികുത്തിയാഴത്തില്‍ മണ്ണിട്ടുമൂടി-
യതിന്മേലെയെന്നെ ഞാന്‍
കഠിനമാം ശിലയായെടുത്തു വെക്കുന്നു
3
പലതുണ്ട് പറയുവാനെങ്കിലുമെന്‍ പ്രിയേ
പ്രണയമില്ല,തിനാലെ മൌനിയാകുന്നു ഞാന്‍.