ശത്രുക്കൾ

നാളിതുവരെയുള്ള എഴുത്തും പ്രസംഗവും കൊണ്ട് എനിക്ക് സുഹൃത്തുക്കളെക്കാളധികം ശത്രുക്കളെയാണ് കിട്ടിയത്.രാഷ്ട്രീയമായ അഭിപ്രായവ്യത്യാസങ്ങളുടെ പേരിലുള്ള അകൽച്ചയും ശത്രുത തന്നെയും മനസ്സിലാക്കാനാവും.പക്ഷേ,എന്റെ ശത്രക്കളിൽ പലരും എന്നെ അകാരണമായാണ് വെറുക്കുന്നത്.അവർക്ക് അവരുടെതായ കാരണങ്ങളുണ്ടാവും.എനിക്ക് പക്ഷേ അത് പിടി കിട്ടുന്നില്ല.ഇക്കാര്യത്തെ കുറിച്ച് ഇടക്കൊക്കെ ആലോചിക്കാറുണ്ടെങ്കിലും അൽപവും വേവലാതിപ്പെടാറില്ല.എന്റെ എഴുത്തുരീതിയിലോ പ്രസംഗരീതിയിലോ എന്തെങ്കിലും വ്യത്യാസം വരുത്താൻ ഉദ്ദേശിക്കുന്നുമില്ല.ഉള്ളിൽ വന്നു വീഴുന്ന, അല്ലെങ്കിൽ അവിചാരിതമായി ഉരുവം കൊള്ളുന്ന ഒരു കഥാവസ്തുവോ വിചാരമോ ആവശ്യപ്പെടുന്ന രൂപം സ്വീകരിച്ചാണ് ഞാൻ എഴുതിപ്പോന്നിട്ടുള്ളത്.ഇനിയും ആ വഴിയേ തന്നെ ഞാൻ മുന്നോട്ടുപോവും.