സുഗന്ധി എന്ന ആണ്ടാൾ ദേവനായകി

ടി.ഡി.രാമകൃഷ്ണന്റെ 'സുഗന്ധി എന്ന ആണ്ടാൾ ദേവനായകി 'നന്നായി വായിക്കപ്പെട്ടു വരുന്ന നോവലാണ്.ഭാവനാനിർമിതമായ ചരിത്രവും മായികസംഭവങ്ങളും വർത്തമാനകാലത്തെ ഫാസിസ്റ്റ്‌സ്വഭാവമുള്ള ഒരു ഭരണകൂടത്തിന്റെ ഭീകരമായ ചെയ്തികളുമെല്ലാം കൂടിച്ചേർന്നു രൂപപ്പെടുത്തുന്ന ഇതിവൃത്തമാണ് നോവലിനുള്ളത്.'സുഗന്ധി എന്ന ആണ്ടാൾ ദേവനായകി 'യെ നിർല്ലോപം പുകഴ്ത്തിക്കൊണ്ട് മധുപാൽ എഴുതിയ ആസ്വാദനത്തിൽ 'ആധുനിക  കാലത്തെ ഒരു ഹോളിവുഡ്ഡ് ചലച്ചിത്രത്തിന്റെ ബ്രഹ്മാണ്ഡാവസ്ഥ ഈ നോവൽ വായനക്കാരനിലേക്ക് പകരുന്നു 'എന്നെഴുതിയിട്ടുണ്ട്.വളരെ കൃത്യമായ ഒരു നിരീക്ഷണമാണത്.
ഹോളിവുഡ്ഡ് സിനിമകൾ അവയുടെ സാങ്കേതിക വൈദഗ്ധ്യം കൊണ്ടും അവ നൽകുന്ന കാഴ്ചകളുടെ വൈവിധ്യവും സമൃദ്ധിയും കൊണ്ടും നമ്മെ അത്ഭുതപ്പെടുത്തും.'സുഗന്ധി എന്ന ആണ്ടാൾ ദേവനായകി'ക്കും ആ മട്ടിലുള്ള  പ്രത്യേകതകളുണ്ട്.പുതിയ നോവൽവായനക്കാരിൽ ഗണ്യമായ ഒരു വിഭാഗം നോവലിൽ നിന്ന് ഈ വക സംഗതികൾ പ്രതീക്ഷിച്ചു തുടങ്ങിയതുകൊണ്ട് അടുത്ത ഒരു ദശകക്കാലത്തേക്കെങ്കിലും മലയാളത്തിൽ ഇത്തരം നോവലുകളുടെ പെരുപ്പം പ്രതീക്ഷിക്കാം.