ചെറുതേ വലുത്!

ഞാൻ പുറത്തിറങ്ങാതായി
സൗഹൃദസംഭാഷണങ്ങളും സഞ്ചാരങ്ങളും ഇല്ലാതായി
പ്രസംഗവേദികളിൽ നിന്നും
പൊതുചടങ്ങുകളിൽ നിന്നും ഒഴിവായി
എന്റെ ലോകം ചെറുതായി
ഒരു കുട്ടിപ്പുസ്തകത്തിലെ ഭൂഗോളം പോലെയായി
എങ്കിൽ തന്നെ എന്ത്?
അതിലുണ്ട് നാനാജനപദങ്ങൾ
ജീവജാലങ്ങൾ
മഹാസമുദ്രങ്ങൾ
പർവതങ്ങൾ
സമതലങ്ങൾ
അഗാധഗർത്തങ്ങൾ
ഇപ്പോഴറിയുന്നു:
ഈ ചെറിയ ലോകത്തിലെത്തിയപ്പോഴാണ്   
ഞാൻ ഭൂമിയോളം വലുതായത്!
2/2/2015