കവിതാഡയറി

21
ആദ്യമായൊരു ഫ്രിഡ്ജ് വാങ്ങിയപ്പോള്‍
അന്തിക്ക് കനം വെക്കാന്‍ കാത്തുനിന്നിരുന്നു
ഇരുട്ടത്ത് ആരും കാണാതെ
ഒളിച്ചൊളിച്ചാണത് വീട്ടിലെത്തിച്ചത്
അത്രമേല്‍ ആത്മനിന്ദയും
അപരാധബോധവുമുണ്ടായിരുന്നു
ടി.വി വാങ്ങുമ്പോഴേക്കും
അത് കുറച്ചൊന്നു കുറഞ്ഞു
വാഷിംഗ് മെഷീന്‍ അത് പിന്നെയും കുറച്ചു
മൊബൈലും ലാപ്ടോപ്പും
സ്വന്തമാക്കുമ്പോഴേക്കും
അത് നാമമാത്രമായി
ഇന്നിതാ ഞാനൊരു കാറ് വാങ്ങുന്നു
ആത്മനിന്ദയില്ല
അപരാധബോധമില്ല
അഭിമാനമോ ആനന്ദമോ ഇല്ല
കാറ് വാങ്ങുന്നു എന്നതിന്റെ അര്‍ത്ഥം
കാറ് വാങ്ങുന്നു എന്നു മാത്രമാണ്.
17-4-2012